______________________________________________

(រាជធានីភ្នំពេញ)៖ នាព្រឹកថ្ងៃទី១៩ ខែមីនា ឆ្នាំ២០២៥ វិទ្យាស្ថានជាតិស្ថិតិ នៃក្រសួងផែនការ បានប្រារព្ធពិធីប្រកាសផ្សព្វផ្សាយស្តីពី របាយការណ៍លទ្ធផលចុងក្រោយនៃអង្កេតចន្លោះជំរឿនប្រជាជននៅព្រះរាជាណាក្រកម្ពុជាឆ្នាំ២០២៤ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ។ ពិធីនេះ មានការអញ្ជើញចូលរួម ឯកឧត្តម លោកជំទាវ ជាថ្នាក់ដឹកនាំជាន់ខ្ពស់នៃក្រសួងផែនការ ឯកឧត្តមប្រធានក្រុមប្រឹក្សាភិបាលវិទ្យាស្ថានជាតិស្ថិតិ នាយកវិទ្យាស្ថានជាតិស្ថិតិ ថ្នាក់ដឹកនាំនិងមន្ត្រីជំនាញនៃវិទ្យាស្ថានជាតិស្ថិតិ និងតំណាងក្រសួង ស្ថាប័ន និងដៃគូអភិវឌ្ឍ។

______________________________________________________

(រាជធានីភ្នំពេញ)៖ នាព្រឹកថ្ងៃទី១៩ ខែធ្នូ ឆ្នាំ២០២៤ វិទ្យាស្ថានជាតិស្ថិតិ នៃក្រសួងផែនការ បានប្រារព្ធពិធីប្រកាសផ្សព្វផ្សាយស្តីពី របាយការណ៍អង្កេតកសិកម្មកម្ពុជាឆ្នាំ២០២២ និងរបាយការណ៍អង្កេតកសិកម្មកម្ពុជាឆ្នាំ២០២៣ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ។ ពិធីនេះ មានការអញ្ជើញចូលរួមពី លោកស្រី Rebekah Bell នាយិកាអង្គការស្បៀង និងកសិកម្មនៃសហប្រជាជាតិ (FAO) ប្រចាំកម្ពុជា, ឯកឧត្តម គិត សេង អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ, ឯកឧត្តម លោកជំទាវ ជាថ្នាក់ដឹកនាំជាន់ខ្ពស់នៃក្រសួងផែនការ ថ្នាក់ដឹកនាំនិងមន្ត្រីជំនាញនៃវិទ្យាស្ថានជាតិស្ថិតិ និងតំណាងក្រសួង ស្ថាប័ន និងដៃគូរអភិវឌ្ឍ។

_________________________________________

វិទ្យាស្ថានជាតិស្ថិតិនៃក្រសួងផែនការ ក្រោមការឧបត្ថម្ភគាំទ្រដោយអង្គការ Vital Strategies បាន​​បើកសិក្ខាសាលាផ្សព្វផ្សាយរបាយការណ៍វិភាគស៊ីជម្រៅ​ដោយ​ប្រើប្រាស់​ទិន្នន័យ​អង្កេត​ប្រជា​សាស្ត្រ និងសុខភាពកម្ពុជាឆ្នាំ ២០២១-២០២២ ដោយមានតំណាងក្រសួងកិច្ចការនារី និង​ក្រសួង​សុខាភិបាល និងស្ថាប័នជាដៃគូរអភិវឌ្ឍន៍នានាចូលរួមជាង ២០០ នាក់ នាវេលាព្រឹក​ថ្ងៃទី៧ ខែមិថុនា ឆ្នាំ២០២៤ នៅសណ្ឋាគារភ្នំពេញ។

ឯកឧត្តម ប៊ិន ត្រឈៃ រដ្ឋមន្រ្តីក្រសួងផែនការបានថ្លែងក្នុងឱកាសជាអធិបតី​ក្នុង​ពិធីបើក​សិក្ខា​សាលា​​ផ្សព្វផ្សាយនេះបានលើកឡើងថា ដើម្បីឆ្លើយតបទៅនឹងតម្រូវការស្ថិតិរបស់អ្នកប្រើប្រាស់ វិទ្យាស្ថានជាតិស្ថិតិក៏ដូចជាអង្គភាពស្ថិតិនៅក្នុងក្រសួងស្ថាប័នពាក់ព័ន្ធផ្សេងៗទៀតរបស់រាជរដ្ឋាភិបាល មានកាតព្វកិច្ចក្នុងការបោះពុម្ព និងផ្សព្វផ្សាយ​ទិន្នន័យ​ស្ថិតិ​ផ្លូវ​ការ​របស់​ខ្លួន​ សម្រាប់​ផ្តល់​ដល់​អ្នក​ប្រើប្រាស់ទូទៅ។

ឯកឧត្តមបន្តថា ក្នុងន័យនេះហើយទើបវិទ្យាស្ថានជាតិស្ថិតិនៃក្រសួងផែនការ បានសហការ​ជាមួយ​ក្រសួង​ពាក់ព័ន្ធដូចជា ក្រសួងសុខាភិបាល និងក្រសួងកិច្ចនារី បានរៀបចំ​របាយការណ៍​វិភាគ​ស៊ី​ជម្រៅដោយប្រើទិន្ន ន័យអង្កេតប្រជាសាស្រ្ត និងសុខភាពកម្ពុជាឆ្នាំ ២០២១ -២០២២ ដោយ​ផ្តោតលើប្រធានបទសំខាន់ៗ ចំនួន៣ គឺរបាយការណ៍ស្តីអំពីអំពើហឹង្សាក្នុងគ្រួសារ ដែល​ជា​កិច្ច​សហប្រតិបត្តិការរវាងវិទ្យាស្ថានជាតិស្ថិតិ និងក្រសួងកិច្ចការនារី។

ក្នុងឱកាសនោះដែរ ឯកឧត្តម ទ្រី ឫទ្ធា អគ្គនាយកនៃវិទ្យាស្ថានជាតិស្ថិតិនៃក្រសួងផែនការ លើក​ឡើង​ថា តាមរយៈកិច្ចសហការយ៉ាងជិតស្និទ្ធរវាងវិទ្យាស្ថានជាតិស្ថិតិ និងអង្គការ Vital Strategies ក្រោមគម្រោង “គំនិតផ្តួចផ្តើមស្តីពីទិន្នន័យសម្រាប់សុខភាព (Data for Health Initiative: D4H)” របស់  Bloomberg Philanthropies ដែលមានសកម្មភាពសំខាន់ៗដូចជា ការ​ចុះបញ្ជីអត្រានុកូលដ្ឋាន និងស្ថិតិអត្រានុកូលដ្ឋាន និងផលជះនៃការប្រើប្រាស់ទិន្នន័យ ដើម្បី​គាំទ្រ​ដល់​រដ្ឋាភិបាលក្នុងការបង្កើនការប្រើប្រាស់ ទិន្នន័យជាអតិបរមា ព្រមទាំងដើម្បី​លើកក​ម្ពស់​ក្នុង​ការ​ធ្វើ​សេចក្តីសម្រេចចិត្ត ការតាក់តែងគោលនយោបាយ សុខភាពសាធារណៈ។ 

__________________________________________